Racletteplousch Stampf 9.-10. März 2024

Am Samschti öppä uf die Zwöi si Uele, Miguel u ig im Schtampf mitem Proviant itrudlet. D‘Chrischtinä Würschtä isch scho am Vorabä ufä u hetis d‘Hüttä ufgwörmt u tou igfüüret daß mir de nid güterlä.

Mir hei de afä chli vorbereitet für z‘Apero u chli gschnäderet derzue, bis de aui angärä Gäscht nahdisnah itroffä si. Nachämä usgiebigä Apero hetsäch de trotzdäm dr Magä gmäudet für no öppis rächts. Uele het de dr Raclettofä afä gschtartet u ig bi de no Häppärä id Chuchi gah reichä daß mir de ändläch äs feins Raclett chöi gnießä. Das isch de nid lang gangä si die erschtä Hungrigä scho agschtangä u sech vo Uele feinä Raclettchäs uf z‘Täuer lah schtrichä….mmmhhh isch doch eifach lecker schmecker sonäs abgschtrichnigs Raclett. Mit viu Schwatz u Lachers hei mir‘s nahm z‘Nacht zämä gnossä. Mitemä Käfeli u ämänä feinä säuber gmachtä Cake hei mir de no dr Abä versüesst lah usklingä.

Einisch meh ä gmüetlächä u leckerä Raclettplousch geit z‘änd. Merci viu mau dä flissigä Häufer u dä feinä huseigätä Mitbringsel.

Fröiä üs scho uf nächschts Jahr u hoffä wieder uf viu Raclettgluschtägi.

Äs härzlächs Bärg frei…

Vo dä Gröbli‘s Uele, Miguel u Sandra