Pilzlihöck 2024

Samschti am 10. Ouguscht hani einisch meh dr Piuzlerhöck dörfä dürä füehrä. Am morgä um die nüni bini im Schtampf itroffä u ha de mit paar bereits awäsändä Lüt äs Käfeli gnoh. Im Verlouf vom Mittag u Namitag si de nah di‘s nah witeri Mitglieder itroffä. Nachärä härzlächä Begrüeßig het mä de zämä ustuschet wo wär öppis a Piuzä gfundä het oder no uf d‘Suechi geit. O hüür het sech d‘Usbüti i Gränzä ghautä…da z‘Wätter siner Gabriolä gha het, isch das zum Teil merkbar gsi. Vo verbrönntä, verfulätä, wurmigä Piuzä bis gar nüt. Trotzdäm hets glängt fürnäs feins z‘Nacht. Währendem Apero hani de afä rüschtä u schnipslä für z‘Menü. Bi gmüetlächäm zämä höklä uf dr Terassä, bi schönschtem Summerwätter hei mir dä Namitag zämä gnossä mit viu guetä u tröiä Teilnähmer. Für mi hets de gheissä ab id Chuchi gah chochä. Paar liebi Lüt simer tatchräftig cho häuffä bir zubereitig für d‘Piuzachnittä u Salat. Mmmhhh fein isches gsi u gschmöckt hets aunä sehr. Nachem z‘Nacht heimer de birä feinä Glacä dr Abä bimnä gmüetlächä Schwatz lah usklingä. U gli mau si de die meischtä Teilnähmer birä wunderschönä Abäschtimmig gägä Hei zue. Merci viu mau für dä schön u luschtig Tag u fröiä mi scho jetzä ufä Septämber 2025 bim nächschtä Piuzlerhöck.

Äs härzlächs Bärg frei

Sandra Grob