Pilzlerhöck 2023
Am Samschti 12. Ouguscht hei mir dr aujährläch Piuzlerhöck dörfä dürä füehrä. Mir si äs chlises Trüppäli gsi aber o mit meh Jungmannschft aus oscho. Sogar einä vo dä jüngschtä, vilech zuekünftigä Mitglied, mi chli eijährig Änku.
Mir heinis de am Vormittag mau i au Himmusrichtigä ufä Wäg gmacht für die feinä Piuzä gah z’suechä. D’Verhältnis si gar nid so schlächt gsi. Chuum simer ines Waudschtück gschtochä heimer schonä chlinä Schteipiuz gfungä…aber de hetis de z’Wätter urplötzläch ä Schtrich dür d’Rächnig gmacht u äs isch zimli cho schiffä, so dasmer de zwungä wordä si zrüg z’gah. Eh nu, de heimer de paar Schtung gwartet u im Verlouf vom Nami no eis ä Alouf gnoh. Und siehe da, mir si de doch no fündig wordä, o we nid im Übermass aber fürnes leckers z’Nacht hets alleweil glängt. De isch’s mitemä chlinä Apero zum rüschtä gangä vo denä Piuzä. Äs gmüetlächs Bisammäsi u philosofierä u gschprächlä isch nid z’churz cho u Kids heisäch mit schpilä u choslä bim Brunnä verdörlet.
Angäns bini de eis id Chuchi fürnes feins Piuzrisotto z’blöderlä. Mmmhhh het das gmundet u aui hei o tüchtig dr Hunger chönnä schtiuä. Mit viu Huif vo dä Awäsändä isches de az Abwäschä gangä…das isch de supibudi gangä natürläch o dank üsem nöiä „Marie“.
No chli gmüetläch zämä ghöklet u plöiderlet u Paari si de Hei u angäns si de die wo dobä blibä si, eis um z’angärä gah ligä…z’tüppigä Wätter u umäschtöberä im Waud hetis zimli müed gmacht aber schön u gsellig isches alleweil einisch meh gsi. Merci viu mau für das coolä Weekend u vorauem hets mi mega gfröit heimer doch ä gäbägi Jungmannschaft derbi gha!
Ig fröiä mi scho jetz uf z’nächschtä Jahr u hoffä äs klappet o wieder chli mit meh Piuzlerliebhaber…
Äs härzlächs Bärgfrei
Sandra Grob
