12. Oktober 2021

Pilzlerhöck 14. – 15. Ouguscht 2021

Am Samschti churz vorem Mittag bini im Schtampf itroffä fürä Piuzlerhöck. Ä paari vo dä Teilnähmer si de scho i dä Schtartlöcher gsi für gah z’Piuzlä oder Beerälä. Nachemä churzä Schwatz het mä sech de chli abgschprochä wär a weles Plätzli geit gah suechä. Z’Wätter het dieses mau super mitgmacht u hei schtrahländä Sunnäschiin dörfä gnießä…äs bizeli tüppig isches gsi aber das heimer alleweil i chouf gnoh.

Nach paar wenigä Schtungä, si de nah dis nah die Piuzlerfründä umä zrugg zum Schtampf cho. Grad übermässig viu heimer de nid gfungä aber das wo jedes chli bracht het, het tiptop glängt fürnes feins z’Nachtässä. Äs paar wenägi Schteipiuzli, Eierschwümmli u Schwinsöhrli si derbi gsi….mmmhhhh fein!

Währenddäm mir die Usbüti chli grüschtet u pützerlet hei, het mä chli gaperölet u gschnäderet. Dr Jürg het de äs super Quiz zämä gschteut, womä per Biudli het müeßä usäfindä was äch das fürnä Piuz chönnt si u ober ässbar oder giftig isch. Das het de schono grad chli z’hirnä gäh bi teunä Biudli!? Mä het de o chli probiert änang z’häuffä mit erratä, zum teu isch de dä Schuss hingä usä. Aber gfägt hets u het o wieder chli d’Hirnzäuä aktiviert. Für die wo am meischtä Punktzahl erreicht hei, hets de zur Belohnig no äs Priisli gäh. Merci viu mau Jürg für die tolli Idee mit däm Quiz!

Für mi isch’s de angäns mau Zyt gsi für id Chuchi, für dä Piuzlerschmous gah z’plöderlä. Mit flottä Häuferlis hei mir de gli eis  das leckerä Piuzrisotto mit Salat chönnä verputzä….mmmhhh isch das mega fein gsi! Mir hei’s aui gnoßä!

Nachem z’Nacht isch me de no chli zämä ghöklet u het de no über diese u jenes gschwätzt u hie u da hets no äs Witzli gäh. Mit Kafi u feinem Cake het mä de dä schön, wieder einisch meh, lehrrich Tag lah usklingä. A derä Schteu äs härzlächs Dankäschön a aui die wo immer wieder mitmachä, mithäuffä u mitwürkä!  Eifach num schööön!

Äs härzlächs Bärg frei u häbetnech sorg…

Sandra „Sändu“ Grob

Nach oben